ພະແນກສຶກສາທິການ ແລະ ກິລາ ແຂວງວຽງຈັນ ໄດ້ຈັດພິທີປະກາດແຕ່ງຕັ້ງ, ຍົກຍ້າຍຮອງຫົວໜ້າພະແນກ ແລະ ປັບປຸງກົງຈັກການຈັດຕັ້ງ ໃນວັນທີ 03 ມັງກອນ 2025 ທີ່ຫ້ອງປະຊຸມຂອງພະແນກ ໂດຍໃຫ້ກຽດເຂົ້າຮ່ວມ ແລະ ມອບຂໍ້ຕົກລົງແຕ່ງຕັ້ງຂອງ ທ່ານ ທອງສະຫວັນ ວົງສໍາພັນ ຮອງເລຂາພັກແຂວງ ຜູ້ຊີ້ນໍາວຽກພັກ-ພະນັກງານ, ມີທ່ານ ປອ ຄໍາ ຂັນທະວີວອນ ວ່າການຫົວໜ້າພະແນກສຶກສາທິການ ແລະ ກິລາ ແຂວງວຽງຈັນ, ທ່ານຕາາງໜ້າ ພະແນກການອ້ອມຂ້າງແຂວງ, ຄະນະຈັດຕັ້ງແຂວງ, ວິທະຍາໄລຄູບ້ານເກິນ, ຫ້ອງການສຶກສາທິການ ແລະ ກິລາເມືອງ, ໂຮງຮຽນ, ຫົວໜ້າ/ຮອງຂະແໜງ, ສູນ ແລະ ຫໍສະໝຸດ ພ້ອມດ້ວຍພະນັກງານທັງໝົດພາຍໃນພະແນກເຂົ້າຮ່ວມ.
ໃນພິທີ, ທ່ານ ບຸນຮຽງ ໄຊຍະແສງ ຮອງຫົວໜ້າພະແນກພາຍໃນແຂວງ ໄດ້ຜ່ານຂໍ້ຕົກລົງຂອງທ່ານເຈົ້າແຂວງ ສະບັບເລກທີ 2752/ຈຂ.ວຈ, ລົງວັນທີ 25 ພະຈິກ 2024 ວ່າດ້ວຍ ຍຸບສູນສຶກສານິເທດມັດທະຍົມຂອງພະແນກສຶກສາທິການ ແລະ ກິລາແຂວງ ໂຮມເຂົ້າເປັນຂະແໜງພັດທະນາຄູ ແລະ ຍົກຍ້າຍພະນັກງານສູນສຶກສານິເທດມັດທະຍົມບາງຈໍານວນມາປະຈຳການຢູ່ຂະແໜງພັດທະນາຄູ ແລະ ບາງຈໍານວນໄປປະຈໍາການຢູ່ໂຮງຮຽນ.
ຫຼັງຈາກນັ້ນ, ທ່ານ ກອງແພງ ແກ້ວພູທອງ ຮອງຄະນະຈັດຕັ້ງແຂວງ ໄດ້ຜ່ານຂໍ້ຕົກລົງຂອງທ່ານເຈົ້າແຂວງ ສະບັບເລກທີ 2889/ຈຂ.ວຈ, ລົງວັນທີ 23 ທັນວາ 2024 ວ່າດ້ວຍການຍົກຍ້າຍ ທ່ານ ຈັນສົມ ແກ້ວມະນີວົງ ຮອງຫົວໜ້າພະແນກສຶກສາທິການ ແລະ ກິລາແຂວງ ໄປຮັບໜ້າທີ່ໃໝ່ຢູ່ວິທະຍາໄລຄູບ້ານເກີນ ແລະ ຜ່ານຂໍ້ຕົກລົງ ສະບັບເລກທີ 2887/ຈຂ.ວຈ, ລົງວັນທີ 23 ທັນວາ 2024 ວ່າດ້ວຍການແຕ່ງຕັ້ງ ທ່ານ ປອ ບົວຄ່ອງ ແກ້ວອາສາ ຮອງຜູ້ອໍານວຍການວິທະຍາໄລຄູບ້ານເກິນ ເປັນຮອງຫົວໜ້າພະແນກສຶກສາທິການ ແລະ ກິລາແຂວງວຽງຈັນ